ភ្នំពេញ៖ ប្រធានគណបក្សប្រជាជនកម្ពុជា សម្តេចតេជោ ហ៊ុន សែន បានបញ្ជាទៅមេធាវីគណបក្សមេធាវីគណបក្សពិនិត្យលទ្ធភាពប្ដឹងមនុស្ស ២នាក់គឺលោក សុន ឆ័យ និងលោក សឹង សែនករុណា ដោយថាអ្នកទាំងពីរបានអត្ថាធិប្បាយវាយប្រហារខុសពីការពិតមកលើគណបក្សប្រជាជនទាក់ទងនឹងរឿងការសម្រេចរបស់តុលាការលើបណ្ដឹងបរិហារកេរ្តិ៍ជាសាធារណៈដោយគណបក្សប្រជាជនទៅលើលោក សុន ឆ័យ។
សម្ដេចតេជោ ថាគណបក្សប្រជាជនកម្ពុជានឹងមិនផ្តល់ឱកាសសម្រាប់មនុស្សណាក៍ដោយប្រមាថមើលងាយងាយគណបក្សតទៅទៀតទេ។
សម្តេចតេជោលើកឡើងដូចនេះលើបណ្តាញសង្គមសម្តេចផ្ទាល់ ដោយភ្ជាប់ជាមួយសេចក្តីថ្លែងការណ៍របស់មេធាវីតំណាងគណបក្សប្រជាជនកម្ពុជា ទាក់ទងនឹងបទសម្ភាសន៍របស់ លោក សុន ឆ័យ ជាមួយវិទ្យុបារាំងអន្តរជាតិ នាថ្ងៃទី៤ ខែកុម្ភៈ ឆ្នាំ២០២៤។
សម្តេចតេជោបានបញ្ជាក់ថា៖ «គ្មានការយោគយល់ណាសម្រាប់ផ្តល់ឱ្យពួកអ្នកទៀតទេព្រោះនៅពេលអ្នកវាយប្រហារមកលើគណបក្សប្រជាជនឬមកលើខ្ញុំតើពួកអ្នកមានបានយោគយល់ដល់យើងដែឬទេ?»។
សម្តេចគូសបញ្ជាក់ថា៖«សិទ្ធរបស់អ្នកមានព្រំដែនជាមួយសិទ្ធរបស់ខ្ញុំ»។
ជាមួយគ្នានេះ សម្តេចតេជោ ហ៊ុន សែន បានបន្ថែមថា ក្នុងការចុះផ្សាយក៍មានការនិយាយដោយ លោក សឹង សែនករុណា ដូចនេះសម្តេចតេជោ ស្នើឱ្យមេធាវីគណបក្សប្រជាជនកម្ពុជាសិក្សាផ្លូវច្បាប់ដើម្បីប្តឹងបុគ្គលរូបនេះទៀតប្រសិនមានមូលដ្ឋានគ្រប់គ្រាន់ខាងផ្លូវច្បាប់។
គួរឱ្យដឹងដែរថា មេធាវីតំណាងគណបក្សប្រជាជនកម្ពុជា ចេញសេចក្តីថ្លែងការណ៍ នាថ្ងៃទី៤ ខែកុម្ភៈ ទាក់ទងនឹងបទសម្ភាសន៍របស់ លោក សុន ឆ័យ ជាមួយវិទ្យុបារាំងអន្តរជាតិថា ជាការបកស្រាយដែលមានចរិតលក្ខណៈកេងចំណេញនយោបាយ និងធ្វើឱ្យប៉ះពាល់ដល់ការអនុវត្តសិទ្ធិតាមផ្លូវច្បាប់របស់គណបក្សប្រជាជនកម្ពុជា៕
